ស្វាយរៀង៖ នាថ្ងៃសុក្រ ទី១២ ខែកក្កដា ឆ្នាំ២០២៤ នេះ មន្ត្រីជំនាញនៃក្រសួងពាណិជ្ជកម្ម ដែលដឹកនាំដោយ ឯកឧត្តម ខឹម ផល្លី ប្រធានតំណាងក្រសួងពាណិជ្ជកម្មប្រចាំរដ្ឋបាលតំបន់សេដ្ឋកិច្ចពិសេសមេនហាតធេន បានចុះពិនិត្យក្រុមហ៊ុនទើបបង្កើតថ្មីចំនួន២ នៅតំបន់សេដ្ឋកិច្ចពិសេស មេនហាតធេន ខេត្តស្វាយរៀង ដែលបានស្នើសុំចុះបញ្ជីក្នុងប្រព័ន្ធអនុគ្រោះពាណិជ្ជកម្ម ដើម្បីរៀបចំបំពេញឯកសារពាក់ព័ន្ធសម្រាប់ការចុះបញ្ជីក្នុងប្រព័ន្ធទូទៅនៅក្រសួងពាណិជ្ជកម្ម។

ក្រុមហ៊ុនទាំងពីរនោះ រួមមាន៖ ទី១-ក្រុមហ៊ុន អៃរុយ ប្រេក ស៊ីស្ទឹម (ខេមបូឌា) ឯ.ក មានដើមទុនចុះបញ្ជីវិនិយោគចំនួន ៥.០០០.០០០ (ប្រាំលាន) ដុល្លារអាម៉េរិក បានបោះទុនវិនិយោគបរទេសដោយផ្ទាល់ ១០០ភាគរយ ដើម្បីបង្កើតរោងចក្រផលិត និងផ្គុំដំឡើងហ្វ្រាំងគ្រប់ប្រភេទ។ ទី២-ក្រុមហ៊ុន សេនត្រល ទ្រី (ខេមបូឌា) ឡាយធីង ថេកណឡជី ឯ.ក មានដើមទុនចុះបញ្ជីវិនិយោគចំនួន ២.០០០.០០០ (ពីរលាន) ដុល្លារអាម៉េរិក ដោយបង្កើតរោងចក្រផលិតដើមណូអែល សម្ភារៈតុបតែងលម្អដើមណូអែល អំពូលភ្លើងលម្អ និងវត្ថុអនុស្សារីយ៍។

តាមការបញ្ជាក់ ក្រុមហ៊ុនទាំងពីរនេះមានគោលដៅនាំចេញដំបូងគឺសហរដ្ឋអាមេរិក និងកាណាដា៕